Með nýrri ríkisstjórn fylgja nýjar áherslur á verkefni ríkisins sem geta haft áhrif á uppbyggingu ráðuneyta í Stjórnarráði Íslands og stofnanauppbyggingu ríkisins. Breyting á verkefnum, tilfærsla þeirra á milli ráðuneyta eða stofnana og breyting á ráðuneytum eða stofnunum hefur bein áhrif á skjalavörslu og skjalastjórn þeirra aðila sem eiga í hlut. Í breytingaferli er mikilvægt að hugað sé strax í upphafi að skjalamálunum og hvernig skuli standa að þeim þegar breytingarnar ganga í gegn.   

Þjóðskjalasafn Íslands hefur gefið út leiðbeiningaritið Sameining ríkisstofnana, færsla verkefna, niðurlagning og einkavæðing ríkisaðila. Leiðbeiningar um skjalastjórn og skjalavörslu sem fjallar um þau atriði sem þarf að hafa í huga við þær breytingar sem nefndar hafa verið hér á undan og hafa áhrif á skjalasöfn afhendingarskyldra aðila. Þættir sem þarf m.a. að huga að við tilfærslu og breytingar á verkefnum eru hvort endurnýja þurfi málalykla, skjalavistunaráætlanir og grisjunarbeiðnir. Þá þarf að huga að tilkynningu rafrænna gagnasafna. Einnig getur komið til greina að afhenda pappírsskjöl  og rafræn gögn til varðveislu á Þjóðskjalasafn.

Skjalaverðir á Þjóðskjalasafni Íslands eru til þjónustu reiðubúnir til að aðstoða við hvernig best er að standa að málunum þegar breytingar á skjalavörslu og skjalastjórn eru annars vegar. Hægt er að hafa samband með því að senda tölvupóst á skjalavarsla@skjalasafn.is eða í síma 590-3300. Ekkert er til fyrirstöðu að funda með viðeigandi aðilum varðandi þau verkefni sem framundan eru.

Skjalavarsla og skjalastjórn afhendingarskyldra aðila teygir anga sína um alla stjórnsýsluna og því hafa efnistökin í Skjalafréttum verið af ýmsum toga. Allt frá skilgreiningum á grunnhugtökum í skjalavörslu og skjalastjórn og til upplýsinga um áhrif eldgosamengunar á skjöl og gögn.

Á þessum tæpu átta árum hefur útlit fréttabréfsins einnig tekið breytingum og má sjá hér sýnishorn af því hvernig útlitið hefur þróast frá upphafi.

Í leiðbeiningum Þjóðskjalasafns Íslands er hugtakið verkefni notað yfir verkefni afhendingarskyldra aðila. Með verkefnum er t.d. átt við verkefni afhendingarskyldra aðila sem m.a. eru bundin í lögum, reglugerðum eða sérstökum samþykktum sem sett hafa verið fyrir viðkomandi aðila. Efnissvið í málalykli eiga að endurspegla verkefni afhendingarskyldra aðila.